samnatar by suhas shirvalkar pustak olakh yashwant ho blog

समांतर – शेवटपर्यंत खिळवून ठेवणारी कथा

मराठी वाचन संस्कृती जोपासण्यासाठी मित्रांपर्यंत पोहचवा

आर्थिक विवंचना व आयुष्यात घडत असलेल्या विचित्र घटनांमुळे अडचणीत सापडलेला कुमार महाजन त्याच्या मित्राच्या, वाफगांवकरच्या सांगण्यावरून एका प्रसिद्ध स्वामींकडे आपलं भविष्य जाणून घ्यायला जातो. खरंतर कुमार महाजनचा या सगळ्यावर विश्वास नसतोच, परत त्यात अतिशय घाण, अंधाऱ्या, गलिच्छ, टेकू लावलेल्या व कधीही कोसळेल अशा स्थितीतील इमारतीत हे स्वामी रहात असलेले बघून यात कुठे अडकलो असंच वाटत असतं; पण ते स्वामी त्याला त्याच्या आयुष्यातील अशा काही गोष्टी सांगतात ज्या त्याने कोणालाच सांगितलेल्या नसतात. कुमार स्वामींसमोर नतमस्तक होतो, आणि त्याला खात्री वाटते की आता हेच स्वामी त्याचं भविष्य सांगू शकतील. स्वामी त्याचा हात तर पाहतात पण त्याचं भविष्य सांगण्यास नकार देतात.

का!??

कारण कुमार महाजनच्या हातावरील रेषा दुसऱ्या एका व्यक्तीच्या हातावरील रेषांसोबत जुळणाऱ्या असतात, जी क्वचितच घडणारी गोष्ट असते. ती दुसरी व्यक्ती असते सुदर्शन चक्रपाणी. हा चक्रपाणी देखील २५-३० वर्षांपूर्वी स्वतःच भविष्य पहायला या स्वामींकडे आलेला असतो. आणि या दोघांच्या आयुष्यात घडणाऱ्या काही गोष्टींमुळे त्यांचं भविष्य सांगण्याची आज्ञा त्या स्वामींना नसते. साहजिकच, कुमार महाजनची निराशा होते आणि तो हतबल होऊन तिथून निघून जातो. पण त्यानंतर त्याच्या आयुष्यात अशा काही गोष्टी घडतात ज्या त्याला सुदर्शन चक्रपाणी या व्यक्तीला शोधण्यास, त्याची भेट घेण्यास प्रवृत्त करतात.

कुमार महाजनला इतकेच समजलेले असते, की त्याचं भविष्य हे सुदर्शन चक्रपाणीचा भूतकाळ आहे. आणि तो भूतकाळ त्याला समजला तर स्वतःच्या भविष्यातील चुका तो टाळू शकेल.

पण कुमारला सुदर्शन चक्रपाणी ही व्यक्ती भेटते का? चक्रपाणी नक्की कोण असतो?, त्याची कुमारला मदत होते की नाही? खरंच भविष्य असं समजतं का? ते आपण ठरवलं म्हणून बदलवता येतं का? या सर्व प्रशांची उत्तरं हे पुस्तक वाचत उलघडण्यातच मजा आहे.

सुहास शिरवळकर यांच्या ‘समांतर’ या पुस्तकाचं मलपृष्ठ वाचून पुस्तक वाचायला सुरुवात केली तर खरंतर आपल्याला पुस्तकाचा शेवट काय असेल, याची कल्पना येते… आणि कदाचित यामुळेच मला या कथेचा शेवट इतका आवडला नाही.

पण या कथेत गुंतवणारी सर्वात महत्वाची गोष्ट म्हणजे कथेची मांडणी. शिरवळकरांनी कथा इतकी प्रवाहीपणे लिहिली आहे, की त्यात आपण नकळत गुंतून जातो, आणि एका बैठकीत पुस्तक कधी वाचून झालं हे देखील कळत नाही. कथेतील पात्रं अगदी डोळ्यांसमोर उभी राहतात आणि पुढे काय घडणार याची उत्सुकता कायम राहते. शेवट कळलेला असूनही कथा कोठेही मध्येच कंटाळवाणी होत नाही हे कथेचं आणि शिरवळकरांच्या लेखणीचं वैशिष्ट्यचं म्हणायला हवं.

पुस्तकाच्या अर्पणपत्रिकेत ‘मित्रवर्य श्री. प्रभाकर भडसावळे ह्यांच्याबरोबरील गप्पांच्या रात्रीस‘ असं लिहिलेलंही मला खूप आवडलंय. म्हणजे एखादं पुस्तक असं गप्पांच्या रात्रींना अर्पण करणं ही देखील वेगळीच कल्पना आहे नाही!

कथा उलगडताना कुमारच्या स्वसंवादातून आलेले विचारदेखील फार सुंदर आहेत. आपल्यालाही ते खोलवर विचार करायला भाग पाडतात.

जसं की, कुमार त्याच्या मुलाच्या इच्छांबद्दल बोलतो, ‘पोरांच्या किती साध्या-साध्या इच्छा असतात; पण आपण आपल्या कामांना इतकं महत्व देऊन ठेवलेलं असतं, की त्यादेखील आपण पूर्ण करू शकत नाही! त्यांच्या इच्छांची तीव्रता गरज म्हणून आपल्या लक्षात आल्यानंतरच आपण त्यांची गंभीरपणे दखल घेतो. तोपर्यंत पोरांचा त्यातला आनंद निघून गेलेला असतो!’

किंवा हे स्वभावाबाबतचे वक्तव्य. ‘मनुष्यस्वभावाची ही एक गंमत असते. सांघिकरीत्या त्याला समाजातला कोणतातरी घटक आपल्या दयेवर अवलंबून राहावा, अशी सततची इच्छा असते. तसा जो राहील, त्याची समाजाला दया येते. सहानभूती वाटते. समाज त्याला झटून मदत करतो. पण याच मदतीच्या जोरावर त्यातला कोणी स्वावलंबी होईल, तर समाजाला ते आवडत नाही.’ खरंय ना!

जगाच्या क्रूरपणाबद्दल लिहिलंय, ‘जग असंच असतं. क्रूरपणा करून धोक्याबाहेर राहता येत असेल, तर जग ती संधी कधीच सोडत नाही. राणीच्या बागेत पोरांचा आधार घेऊन मोठी माणसं पिंजऱ्यातल्या सिंहाला डिवचतात, त्याला खडे मारतात, डरकावून दाखवतात… त्यातलाच प्रकार हा!’

‘समांतर’ या नावाचा अर्थ सांगताना मलपृष्ठावर लिहिलंय, की ‘डायरीतलं प्रत्येक पान त्याचा उद्याचा दिवस कसा आहे ते सांगत असतं… पण शेवट मात्र अधांतरीच असतो… होय अधांतरीच… कारण तसंच ‘समांतर’ आयुष्य नशिबात आलेला कोणीतरी भेटल्याशिवाय आधीच्याला मुक्ती नसते. काळ मात्र तसाच पुढे जाणार असतो, सतत कोणालातरी ‘समांतर’ आयुष्य जगायला लावत….’

पुस्तकावरील सीरिज देखील सध्या खूप गाजतेय. सीरिजमध्ये काही अतिरिक्त प्रसंग टाकले आहेत, जे मूळ पुस्तकातल्या कथेत नाहीत आणि त्यात सध्याच्या काळातील चित्रण आहे जे काही प्रमाणात गुंतवून ठेवणारे वाटले. सीरिजचा शेवटही पुस्तकापेक्षा वेगळा असेल किंवा असावा असं वाटतंय.

सीरिजमुळे व शेवट काय असेल या उत्सुकतेने हे पुस्तक वाचणाऱ्यांची संख्या वाढतेय. पुस्तकात शेवटी अपेक्षेप्रमाणे काही आश्चर्यकारक घडत नाही म्हणून निराशा होण्याची शक्यता आहे, पण शेवटपर्यंत खिळवून ठेवणारी कथा म्हणून हे पुस्तक वाचायला हरकत नाही.

पुस्तकाची लिंक सोबत देत आहे, नक्की खरेदी करा!

खाली सुहास शिरवळकरांच्या इतर पुस्तकांची लिंक सुद्धा देत आहे.


 पुस्तकं वाचण्यासाठी आम्हाला अतिशय उपयुक्त वाटलेलं असं हे BOOK STAND ज्याचा तुम्ही iPad , Mobile किंवा Kindle यातून वाचन करताना सुद्धा उपयोग करू शकता.

वाचकांच्या विनंतीवरून आम्ही पुस्तक वाचण्यासाठी आणि इतर लिखाण किंवा laptop सोयीस्कर रित्या वापरता यावा म्हणून जो टेबल गेली ४-५ वर्ष वापरत आलो आहोत त्याची लिंक येथे दिली आहे. Click Here.

For Other Products by the same brand Click here

वाचनाच्या आवडीला पूरक असं साहित्य आम्ही वेळो वेळी तुम्हाला सांगत राहू.


ashwini survey

अश्विनी सुर्वे

अश्विनी लहानपणापासून वाचन वेडी आहे.. इतकी की भेळ खाल्लेला कागद सुद्धा तिने न वाचता फेकला नाही (अर्थात कचऱ्याच्या डब्यात)!

Facebook Profile

Instagram Profile

ता.क.१.  तुमच्या आवडीची पुस्तकं व्यवस्थित ठेवण्यासाठी आम्ही BOOK BAGS बनवल्या आहेत, त्या नक्की पहा.

ता.क.२ तुमच्या वाचण्यात असं कोणतं पुस्तक आलं असेल, ज्याने तुमचा जगण्याचा दृष्टीकोन बदलला किंवा ते तुम्हाला इतकं आवडलं कि तुम्ही त्याबद्धल भेटेल त्या व्यक्ती सोबत बोलू लागलात. (थोडक्यात असं पुस्तक जे तुम्हाला वेड लावून गेलं, चांगल्या अर्थाने 😛 ). अशा पुस्तकांबद्धाल आम्हाला जरूर कळवा. इथे आम्ही त्या पुस्तकाबद्धलचा तुमचा अभिप्राय तुमच्या नावासोबत पब्लिश करू. चांगली पुस्तकं सर्वांपर्यंत पोहचायला हवीच.

तुमच्या कमेंट्सची आम्ही वाट पाहतोय


मराठी वाचन संस्कृती जोपासण्यासाठी मित्रांपर्यंत पोहचवा

  • Reply Parshuram Patharkar October 9, 2020 at 6:56 pm

    छान लिहिता ताई. शुभ आशिर्वाद!

    • Reply admin October 20, 2020 at 7:24 pm

      धन्यवाद!

  • Reply Madhuri More October 9, 2020 at 6:56 pm

    मी वाचलेली नाही पण तुझ्या लिखाणाने वाचायची उत्सुकता वाढली हे नक्की 👍

    • Reply admin October 20, 2020 at 7:26 pm

      धन्यवाद !

    Leave a Reply

    Whatsapp करा
    1
    मदत हवी आहे?
    नमस्कार! यशवंतहो.com वर आपलं स्वागत!

    विविध पुस्तकांची माहिती मिळवण्यासाठी 7208-7272-36 हा मोबाईल क्रमांक कृपया सेव्ह करावा.
    Whatsapp Broadcaste द्वारे तुम्हाला सर्वात पहिली अपडेट मिळत राहील. त्यासाठी आम्हाला Whatsapp करा.

    चांगल्या पुस्तकांची ओळख तुमच्यापर्यंत पोहोचविण्यास आम्हाला आनंद होत आहे.
    वाचत रहा,
    धन्यवाद!